عود أحمد

عود احمد 🙂

(محدش يسألنى ميين دول انا معرفش طبعا , و اى تشابه بينه و بين الواقع انا مليش دعوة و ربنا )

احم ….

بسم الله الرحمن الرجيم ..

قررت انا الموقع ادناه , وانا بكامل قواى العقلية , و بدون اى ضغوط خارجية , ان اعود للكتابة من جديد , على الرغم ما قد يسببه ذلك من عواقب وخيمة على البشرية جميعها (جميعها و ليس كلها … عشان بس نبقى واضحين)

قررت .. ان اكتب , و اكتب , ثم اكتب … و ادون و اسجل كل ما ينبعث داخلى من حاجات مبعثرة  و مشاعر دفينة ,, و مشاهد فى اللاوعى المنبثق من العادات الحياتية الروتنية ( ومحدش يسألنى عن اى حاجة من الحاجات دى , انا شخصيا مش فاهمة)

المهم ,,

انك أيها القارئ الكريم العظيم , انت الآن بصدد الاستمتاع الحقيقى بفنى الادبى العميق , والذى – بدون ايها شك – سيصيبك بكثير جدا من الالهام و المتعة و الهلوسة (و ممكن كحة وزكام لو الدنيا هوا شوية )

المهم انه سوف يصيبك و خلاص ,, وليتولاك الله اذا سيدى القارئ ,,,

 

والله الموفق و المستعان ..

Posted in sarcastic | Leave a comment

انى اتنفس تحت الماء .. انى ابرد ابرد ابرد ….

Image

 

فتحت عينى الصبح .. لقيت الدنيا ضلمة اوى ,,,
“ايه ده هوا انا نمت اد ايه ؟! ”
حاولت استوعب الموقف … وبعد كام فيمتو ثانية بدات ادرك الموضوع ,
انا لسة جوا البطاطين ..
ايون انا جوا البطاطين .. مش تحت البطاطين .. ليه جوا البطاطين ؟؟!!
جوا طبعا عشان لو راسى بره الباطنية هيجى ابو رجل مسلوخة بليل وانا نايمة ياكل راسى ,,
اووفر اووى صح ؟!!
اصل الدنيا برد اوووووى لو بييت راسى برة ممكن اصحى الاقى مناخيرى وقعت من البرد ,
و طبعا هيا مش باطنية واحدة , غالبا انا مش سايبة ولا بطانية فى البيت مش مستحوذة عليها , يعنى ابرد يعنى .. حاجة غريبة جداا !! دى باكيج على بعضيها كدة ..
كل ده مش مهم ..
المهم دلوقتى .. و المهمة المفروض اقوم بها حاليا هيا انى اقوم من السرير ,
يعنى اطلع من جوا البطاطين دى كلها , اطلع للهوا , للبرد , للساقعة ,,, لاااااااا على جثتى .. مانيش طالعة .. بس هه ,,
تؤ , بس انا لازم هيجيلى يوم و اطلع, كلنا لازم يجى علينا يوم و نطلع ,,
الواحد بردة بيقابل مواقف صعبة فى حياته لازم يكون قراراته فيها قوية كفاية ..
خلاص , انا خدت قرار انى هطلع ..
الواحد لازم يبقى قوى ..
لازم يواجه المصاعب و يبقى شجاع ,,
يلا بقى انا طالعة …
تؤ …
هطلع مرة واحدة كدة , ما كدا هيحصلى صدمة كهروماغنطيسية لما هطلع من الدفا للبرد اوى كدة ,
ده انا ممكن يجيلى نزلة شعبية ,, ممكن كمان التهاب رئوى ,, يالهوى ده انا ممكن اموت فيها ..
الواحد آه لازم يبقى شجاع .. بس مش مجنون .. هوا العمر بعزقة
لأ الواحد لازم يفكر كويس و يلاقى طريقة محنكة يخرج فيها ,,
اننا نريد خطة , لقد هرمنا من اجل هذا اليوم … احم ,,
انا بقول لازم الواحد يجس نبض الجو الاول ,, و بعدين يشوف هيتحمل الصدمة ولا لأ,
انا هخرج ايدى كدة برة و اشوف الجو ,
….
ايه ده !!! ايه السقعة دى !!
ده انا لو طلعت هتجمد ,,
لأ مناش طالع بقى ..
انا هنا حلوة و زى الفل ,, و مرتاحة جدا ,
الواحد مش لازم يبقى قوى اوى فى قرارته يعنى ,
ممكن يستسلم للدفا عادى ..
ده الدفا حلو و الله ..
يا سلااااممم !! بقى فيه حد يسيب الدفا ده !!
يااااه انا كنت هتجنن و اسيب الدفا ده !!

..
و بعد حوالى عشر دقايق كدة حسيت بدوشة فى الاودة
و قبل ما ادرك الموقف لقيت ايد صغيرة عايزة الضرب شالت كل البطاطين من عليا فجأة و ..
“مااااااااااااااان” ( دى يعنى ايمان بس بلغة الاطفال) ” قومى يلا عثان نلعب توا (سوا)”
ده كان ابن خالى جاى يلعب معايا ,
“هوا انت يا … ” انا بكل غيظ الدنيا ,
ده انا بقالى اكتر من ساعتين بخطط و ده جه بوظلى كل حاجة ,, كل حااااااااااجةةةة ,
لقيته فاتح بقه و بيضحك زى العبيط و هومتخيل انى هقوم اجرى وراه وبالتالى هنلعب سوا و هوا ده اللى هوا عايزة بالضبط ,,
“طب تعالى هنا بقى “
و قومت جريت وراه ,, وانا بفكر انهى طريقة اعاقبه بيها ,
اعلقة من رجله فى السقف ؟! تؤ , هيفتكرنى بلاعبه ,
ارميه من الشباك ؟! لأ باباه هيسأل عليه , هقوله ايه ساعتها !!
احبسه فى البلكونة لحد ما يتجمد و ينشف زى الكتكوت ؟! هيا فكرة حلوة بس لو جالة برد هيعيدنى وانا مش ناقصة برد ,
ايووووة لقيته , انا هزغزغة لحد ما يتعلم الادب ,
هوا ده العقاب ولا بلاش , العقاب بالضحك حتى البكاء .. لازم يدخلو اسلوب العقاب ده فى التربية و التعليم ,
الناس دى عمرها ما هتستفيد من عبقريتى الفذة ..

و اخيرااااااا ,,مسكته ..
بس فجأة ادركت حاجة تانية مختلفة , انى انا مبقتش بردانة و انى لما اتحركت دفيت و انى محستش بالبرد اصلا خالص ,
امممممممممم شكلى هعفو عن الواد ده ,
بالعكس انا المفروض اديله حاجة حلوة ,
اديته شكوكولاتة و قلتله يقعد هادى بقى و ميعملش دوشة ,

طيب هنعمل ايه دلوقتى !!
انا بدأت اسقع تانى , هعمل ايه دلوقتى , منا لو قعدت اجرى ورا الاخ ده طول النهار مش هخلص,
رحت على الدولاب و فتحتة , و ف اقل من ثلاث دقايق , كان الدولاب فضى تماما و بقيت انا عبارة عن دولاب متحرك , حرفيا و مجازا ,
و دخلت المطبخ , عشان ابدأ فى مسلسل السوايل السخنة التى لا تنقطع فى الشتاء ابدا ده احنا عايشين على حسها , ده احنا من غيرها نتحول الى قطع جليدية متراكمه,
و بعد ما حضرت كباية النسكافيه التمام ,
فتحت التليفزيون , كنوع من النشاط اللى ممكن الواحد يقوم بيه و هوا متكلفت فى مكانه , فتحت على الاخبار كنوع من الاستفتاح و عشان اطمن انا بس اللى كدة ولا الناس كلها فى نفس معاناتى ,
“الاسكندرية تغرق “
لا اله الا الله,
“مراكب صيد تتعرض للغرق فى مطروح نتيجة ارتفاع الامواج”
لا حول ولا قوة الا بالله,
ده الناس حالتهم اصعب بمراحل ,
قررت احول القناة يمكن الاقى حاجة تفرح , نجيب القنوات المحلية يمكن نلاقى فيها كرتون ولا حاجة ,
ظهرت المذيعة الجليلة بطلعتها البهية تقول : ” و بمناسبة الاجواء التى تعيشها العاصمة نعرض لكم فى الفقرة القادمة اغنية للراحل الجميل احمد نجيب”
“الدنيا برد يا عم خليل, و بتسقى الورد يا عم خليل”
فعلا!!! عم خليل ده ايه ان شاء الله ؟! خارج فى عز البرد و المطر عشان يسقى الورد !! بنسبة لإن الورد زمانه غرق و المية خلعته من مكانه اصلا !!
و بعدين ايه الراجل ده !! جتله منين الشجاعة يخرج فى البرد ده !!
الراجل ده شكله يا عميل يا ارهابى يا ضارب ترمادول ..
بعد انتهاء الفقرة , تليفونات كتير تيجى للمذيعة تعلقيا على الاغنية :

المتصل الاول :
” ازيك يا استاذة …. انا من اشد المعجبين ببرنامج حضرتك , انا بس ليا تعليق بسيط على الاغنية اللى حضرتك عرضتيها من شوية,
انا احب اقول انه نوع من الاستفزاز ان تطلع اغنية زى دى فى وقت زى ده , تفتكرى حضرتك مين السبب فى ده , و مين ورا الاغنية دى و مين قاصد يعرضها دلوقتى
بقصد استفزاز الشارع المصرى , ده اكيد واحد من الناس اللى عايشين برا مصر فى الدفا و راجع تبع اجندة و مخطط معين انه يثير الفتنة فى الشارع المصرى”

المذيعة ترد :
“بس حضرتك دى اغنية بقالها سنين طويلة جداا , و الفنان المصرى النوبى , احمد نجيب هوا اللى عملها “
” ما حضرتك مصر عليها العين من 7000 سنة و حضرتك عارفة من ايام الهكسوس “

انا : ” يانهار اسود !!! هكسوس !! انا قلت الراجل عميل اه بس مش كدة يعنى .

المتصلة الثانية : اللى كانت تقريبا بتزعق و بتصوت فى معظم الكلام
“حضرتك يا استاذة …… انا بضم صوتى لصوت المتصل اللى فات و بقول لكل الناس اللى يهمها دمار مصر
اننا – حزب التكلفتين- مش هنسمح ابدا بالمهازل دى ولا للمخطاطات تقسيم مصر, احنا اه متكلفتين بس متابعين و فاهمين كل حاجة و عارفين اللى هما بيفكروا فيه
و مش هنسمح ابدا بالفتنة “

طبعا الخط قطع ..

انا : واضح ان الموضوع كبير و انا مكنتش اعرف ..

المتصل الثالث:
” استاذة … انا بس حابب اقول لحضرتك و مشاهدينك الكرام , ان كل واحد من حقة يسقى الورد و ان دى حرية شخصية , و احنا حزب بيدافع عن الحرية بندافع عن عم خليل و الناس اللى زية ,
فى الحقيقة احنا كلنا عم خليل , و لو حد اتعرض لعم خليل فهوا بيتعرض لحرية كل مواطن حر فى يحمل الجنسية المصرية و احنا مش هنسكت “

المتصل الرابع :
“احب اقول للمتصل اللى فات و لكل ميليشيات عم خليل اننا نعلم جيدا اجنداتكم و لدينا مصادرنا و ميليشياتنا , و اننا لا نخاف و نهدد “

المتصل الخامس:
“الى الاخ خليل , تب الى الله اخى و ارجع اليه و انضم الى جماعتنا , جماعة المسلمين البردانين”

المتصل الاخير :
” الله يخربيتكم خربتم البلد , البلد بتنهااااااار و انتو قاعدين هنا تترغوا و تلكوا ,, حسبى الله و نعم الوكيـ …….. تييييييت”
طبعا قطعوا عليه الخط ..

انا : فعلا حسبى الله ونعم الوكيل :s

بعد المشاحنات دى كلها ,, قررت انى اطفى التليفزيون ,
انا كنت عايزة حاجة تنسينى البرد و التكتكة و الاسعار اللى زادت و الدولار اللى مسح بكرامة الجنية الارض,
و الناس اللى ماتت غرقانة و الشوارع اللى اتبهدلت بالمطر ,
لكن واضح ان الشعب المصرى كله ماشى بمبدأ ..
ادينى فى الهايف وانا احبك يا فننس 😐

ليلتكم سعيدة

 

Posted in sarcastic | Leave a comment

اول انترفيو 2


خرجت من الشركة الاولانية و انا حاسة بإحباط ,, مش ممكن تكون هيا دى الانترفيوهات !!
كنا بنخش الكلية ليه و بنذاكر ليه و بنوجع قلبنا ليه ؟!
ما كان كورس انجلش ست شهور يقوم بالمهمة ؟!

فكرت كتير مروحش الانترفيو التانى ,حسيت انه مش هيفرق كتيير عن الانترفيو الاولانى , و ان العالم دى كلها بتهزر ,
كان عندى احساس الصدمة العاطفية , اصل الانترفيو الاولانى ده زى الحب الاول كدة , لو اتصدمت فيه بتبقى عايز فترة نقاهة قبل اى قصة انترفيو تانية ,
افتكرت جملة سعيد صالح الشهيرة ” انا لا عايز شهادة ولا بتاع ,,, انا عايز اشتغل ترزى”
ده كان الاحساس المسيطر عليا ساعتها ,
مالهم الترزية عايزة افهم انا ؟!
ناس مبدعين و مهمين جدا فى حياة كل انسان فينا ,
حد يقدر يعيش من غير ترزى ؟!
من غير الترزى كان زمانا كلنا بنشترى القماش بالمتر و نلفوا علينا زى الهنود كدة ,,
و تبقى الموضة , اللفة العادية , و اللفة الاسبانش (اكييد) , و اللفة التركى (على طريقة كريم و مهند) , و اللفة الهندى (على طريقة شاروخان ) ,

و بعد معاناة وصلت لمقر الشركة التانية , و اللى كان شكلها يوحى بإنها فعلا شركة , اكتر من الاولى بكتير ,
كنت قاعدة فى انتظار الانترفيو المرة دى ببرود اووى,
و كان عندى توقع ان اللى هيعملى المقابلة دى هيسألنى فى طريقة عمل البامية , او فى القدرة على التفريق بين شوربة الفراخ و شوربة اللحمة ,
ماهو اى كلام بقى يا عم الحج , و المرة دى بقى كان معنديش مشكلة انى متقبلش , لكن كنت عايزة اخلص , او كان عندى فضول اعرف ايه نوعية الاسئلة اللى هتسألها المرة دى ,

فى الانترفيو:
كان فيه دكتورين بيعملولى الانترفيو,
“اسم حضرتك الدكتورة ؟! “
“ايمان”
انا مش عارفة هوا انا قلت الاسم غلط ولا “ايمان” بقت كلمة عيب الايام دى ولا ايه ,
بس لقتهم هما الاتنين بيضحكوا او بيحاولو يكتمو الضحك , كأنهم سمعوا نكتة ,
كنت هادية جدا لدرجة انى كنت حاسة انى مش انا ,
كنت حاسة انى عايزة اقولهم “بتضحكو كلمة ايمان ؟! طب ايمان ايمان ايمان ؟! ” !!
و بعدين بدؤا يسألونى اسئلة عادية زى تعارف كدة ,
و عن خبراتى فى التسويق اللى كانت معدومة طبعا ,
و كانوا من وقت للتانى بيضحكو برضة من غير مناسبة , كان من الواضح ان الانترفيو بالنسبة لهم (so much fun ) الحقيقة :s
و فى الاخر سألونى السؤال المشهور بتاع
“طب فى الاخر كدة , ايه اللى يخلينا نقبلك “
كانت الاجابة جاهزة جوايا جدا
“عشان انا استحملت سماجة حضراتكو كل الوقت ده ولسة عايشة الحمد لله”
لالالالا انا مقولتش كدة طبعا
انا رديت برضة الاجابة المشهورة بتاعة السؤال ده

و طلبوا منى استنى بره حبه , و بعد شوية بلغونى انى اتقبلت كميديكال ريب,(مندوب مبيعات لشركات الادوية)
و مشيت من هناك و انا قررت انى ارضى بالامر الواقع ,,
و قلت اتمشى حبة ,
و قعدت افتكر اد ايه انا كنت من الحزب الكاره للميديكال ريب ,
ده انا كان ليا خطب و قصائد ذم فى شغلانة الميديكال ريب ,
ده لو كان فيه صفحة على الفيس بوك لكارهى الشغلانة دى انا كنت هبقى الادمن ,

فلاش باك :
انا فى سنة رابعة كلية :
فى حوار مع زمايلى عن الشغل :
“بصوا لو هنتكلم على الشغل فأنا شخصيا ممكن اشتغل اى حاجة فى الدنيا , الا الميديكال ريب ده , ده قلت قيمة و الله”

احم … آآآه انا عرفت الناس دى كانت بتضحك على ايه , الناس دى عارفنى كويس ,
خلاااص امرنا لله ,
ميديكال ريب احسن ما نرمى 14 سنة تعليم فى الزبالة 😐 !!

لما نشوف اخرتها فى البلد اللى فعلا مفيش حاجة فيها محطوطة فى مكانها ..

ليلتكم سعيدة 🙂

Posted in sarcastic | Leave a comment

اول انترفيو

ياااااااااه !! اخيرا الواحد اتخرج !! اخيرا الواحد اتحرر
كلمة سمعتها جوايا بعد ظهور اخر نتيجة لأخر ترم فى كليتى المبجلة , كلية العلوم ,
كان احساس الفراغ غريب عليا اووى , كنت عاملة زى اللى خارج من تأبيدة و مش واخد على الحرية الكتير دى , ده احنا كنا بنمتحن فى الكلية دى اكتر ما بناخد محاضرات,
و عشان الفراغ الواسع ده , فكرت انى ادور على شغل , و كنت مفكرة ان اللى بيخش كلية علوم ده بيطلع بيلاقى الشغل مستنيه و بيتحايل عليه كمان ,
و كنت دايما بفتكر كلام الدكاترة فى اول سنة لينا
طالب كلية العلوم من اهم الطلبة فى مصر و مجالات الشغل ادامه مفتوحة فى كل الاماكن
الواحد كان بيسمع الكلمتين دول و يقول يافرج الله , يعنى بعد المعاناة اللى احنا عايشين فيها دى هنلاقى حد يقدرنا ؟!
لأ خلاص بقى لو على كدة يبقى الواحد يشد حيله الكام سنة دول عشان يتخرج ,
و بلاد تشيلنا و بلاد تحطنا , و نشيل مواد و نعيد مواد , و نخش معامل و نعمل تجارب و نشم ادخنة و ابخرة تودى ورا الشمس , لكن كله يهون فى سبيل المستقبل الباهر ,

و بدأت ادور على شغل ,
و اكتشفت ان الكلام ده كان هرى فى هرى , و ان بتوع علوم دول اغلب خلق الله ,
 , و انهم مش بيشتغلو بشهادتهم اطلاقا ,كلو ببركة دعا الوالدين 
و اكتشفت انك كخريج علوم لازم تبقى على درجة مرونة عالية ,
فإما هتشتغل فى تسويق الادوية ,
او فى معمل تحاليل ,
او تقف فى صيدلية ,
و فى كل الحالات هترمى كل اللى اتعلمته فى الزبالة , هتكتشف انك كل اللى هتبقى محتاجة انك تبقى يا بتعرف تسويق كويس ,
يا اما بتعرف تسحب عينة دم كويس زى فنيين المعامل يعنى ,
فى كل الاحوال , تخصصك ايا كان مش متوفر فى مصر ,
طب و على ايه يا بيه ؟! ما كنا دخلنا اى معهد سنتين و خلاص و كانت هتقوم بالواجب برضة !! “

و اكتشفت بعد تأمل طويل فى اعلانات التوظيف و فى حياتى البائسة كطالبة ,
ان خريجى كلية العلوم يستحقوا لقب ” اللى رقصوا على السلم” بجدارة ,
من ايام ما كانوا فى ثانوية عامة و كان مجموعهم لا هوا عالى زى بتوع طب و هندسة ولا هو قليل زى بتوع حقوق ,
هما الشعبة الغير محددة فى المجتمع ,

و مع ذلك قدمت فى كل الشركات و الجهات المعنية ,
و فى يوم جالى تليفون ,
و سمعت الكلمة اللى استنيتها سنيييييين ,,
انتى عندك بكرة انترفيو عندنا فى الشركة

يومها عملت فرح , ايوووة امال ايه , ده التليفون ده جه بعد شوقه ,
حقيقى ساعتها مفكرتش الشركة دى عايزة تشغلنى ايه ؟!
بس فى الحقيقة انا كان عندى تخيل انهم هيحوطونى فى المكان الصح , (ايوم طبعا زى ما كل حاجة فى مصر ماهيا فى مكانها الصح بالظبببط)
و فجأة التليفون رن تانى :

انتى عندك انترفيو بكرة عندنا فى الشركة
اووووه !!! ده كتير والله!! اتنين انترفيو فى يوم واحد !!
ده ايه ده ؟! ده اكييد ماما دعيلتى كتيييير اوووووى انهاردة
ربنا يخليكيى ليا يا احلى ماما فى الدنيا
يبقى مفيش اى حد هيساعدنى اختار اللبس غيرها,

ماماااااااااا
ايه فيه ايه
انا عندى انترفيو بكرة البس ايه ؟
البسى هدومك يا حبيبتى
لا والله ؟! هدومى ؟! تصدقى اتصدمت ,, ده انا كنت ناوية البس هدوم الجيران ,
ايوة يا ماما يعنى انهى بلوزة على انهى جيبة
البسى اى حاجة من الدولاب و خلصينى
فعلا!! ملبسش من التلاجة يعنى !!
واضح ان مفيش حل تانى , غير انى انزل الدولاب كله و اشوف حاجة مناسبة ,,

و كانت اصعب مهمة فى الليلة دى انى اعرف انام , كنت حاسة انى لو نمت هفوتنى معاد الانترفيو , ولو منمتش هعك
و فضلت فى التوتر ده لحد مانمت ,,
و قعدت احلم انى صحيت متأخر و ملحقتش المترو و جريت ورا الاتوبيس و داس عليا توكتوك و مشيت عليا سحلية ,
و البوليس قبض عليا و مرحتش الانترفيو و قعدت فى السجن لحد ما تجننت و رحت مستشفى المجانين و بقى كل ما حد يقول “انترفيو” قدامى
انزل فيه ضر….

و صحيت من النوم اخيرا , لبست و نزلت و رحت قبل معادى فى الشركة الاولانية ,
بس الحقيقة المدير كان مشغول اوى فى الهزار مع السكرتيره و تهزيق الناس اللى معاه فسابنى ملطوعة بتاع ساعة ,
و فى اثناء الساعة افتكرت دكتور عمرو اللى يمسيه بالخير اما كان بيقولنا

انتو طبعا فاكرين لما اتكلمنا من سنيتين عن مرض الشلل الرعاش و قلنا انه سببه الاساسى نقص الدوبامين فى المخ ,
ايه مش فاكرين ؟! آآآآه انتو بتنسو اللى بتاخدوه بقى ؟! مينفعش الكلام ده خالص يا جماعة , هتعملوا ايه لو رحتو انترفيو ؟!
دول هيهروكو اسئلة من النوعية دى , و ياتعرف تجاوب يا هيقولك مع السلامة , انتو حرين ده مستقبلكو و انتو احرار

و قعدت افكر
” يا ترى الراجل اللى جوا ده هيسألنى فى ايه ؟! انا مش مذاكرة اى حاجة و مش مراجعه اى حاجة و هيبقى منظرى وحش اوى,
ليه انا مسمعتش كلام دكتور عمرو و ذاكرت كويس , ادينى هخش مش هعرف اجاوب اى حاجة”
و كنت خلاص هعيط و كان فاضلى دقيقة و اعتذرلهم و اروح البيت اذاكر كله من الاول ,
لقيت السكرتيرة بتقولى اخش للمدير ,
اتشاهدت و دخلت ,

فى الانترفيو :
قوليلى انتى بتعرفى انجليزى
اه يا دكتور طبعا
شكلك مش بتعرفى انجليزى
حضرتك خدت منين الفكرة دى ؟!
مش عارف , انتى شكلك كدة مش بتفهمى انجليزى
حضرتك انا دراستى كلها بالانجليزى
قام باصص ل سى فيهى (والله كان كله انجلش لانجوتش) و قالى
طب يعنى ايه diabetes
مرض سكر يا دكتور
يعنى ايه independent
يعنى بيعتمد على نفسه
باصلى كدة كانه بيحاول يستنتج انا بجيب الاجابات دى منيين , يمكن عاملة برشامة ولا حاجة !!
حسيت ساعتها انه هيجب ورقة وقلم و هيقولى اكتبى الحروف كلها من A-Z
و هو جاب فعلا ورقة و قلم ,
و رسم مربعات جوا مربعات كتييير اوى و بعدين قالى
فيه كام مربع فى الرسمة دى
لأ ده انت بتهزر بقى , ده انت عايز رياض اطفال مش خريجة علوم !!
ده ناقص يجبلى الوان مية و يقولى ارسمى شجرة و بقرة و لونيهم !!
و قعد يرغى كتييييييييييييييير عن حاجات ملهاش اى 30 لازمة ,

و خرجت من عنده و انا حالفة طلاق تلاتة منا جايلهم تانى و لو هيدونى مليون جنيه ,
و كان عندى رغبة غريبة انى اكلم د/ عمرو و اقولو
ناس طيبين اووى يا خال

يتبع

Posted in sarcastic | Leave a comment

سنة جديدة … سنة سعيد :| !!

صحيت من النوم العصر ,, او بالضبط قبل العصر بخمس دقايق ( الدقة مطلوبة برضة ) , كعادتى طبعا فى الايام اللى بستمتع فيها بلقب “عاطل” بجدارة ,
بس الحق يقال مش دايما بصحى العصر , فى اوقات بصحى الضهر , لحسن تقولو عليا خم نوم ولا حاجة ..
ما علينا .. وكالعادة برضة فى الايام دى و اتجهت ناحية النتيجة .. ايوة ام ورق كتير دى كل ورقة بيوم فى السنة .. و اللى بيبقى فيها حكمة من كدة من امثال ” من جد وجد ومن زرع حصد”
و على الرغم ان عمرى ما استفدت من الحكم دى , الا انى بحبها اوى ,, عادى يعنى ,, الحب عمره ما كان لييه اسباب ..
المهم , كنت رايحة عشان اقطع ورقة جديدة و استكشف حكمة انهاردة , لقيت النتيجة فاضية , اتخضيت للحظة , و بعدين فكرت
” آآآه صحيح, ده امبارح كان اخر يوم فى السنة , تؤ هوا لازم عشان السنة خلصت نجيب نتيجة جديدة ؟! مينفعش يعملو نتيجة سنتين تلاتة كدة ؟؟!! ”
تخيلو لو عملو نتيجة فيها كام سنة مع بعض , و تروح تشترى تقول للراجل ” انا عايز نتيجة 5 سنين لو سمحت ” او مثلا تروح تاخد 2012 و 2013 فالراجل يديك 2014 هدية ,
مش عارفة الناس دى مش بتفكر الافكار العبقرية دى ازاى !!! يلا طوول عمرى اقول انا خسارة فى البلد دى ..
المهم دلوقتى انى عايزة اجيب نتيجة جديدة ..
رحت قلت لماما :
“ماما .. النتيجة خلصت عايزين نجيب واحدة 2012 بقى “
ماما بصيتلى اوى كدة و بعدين قالتلى :
“اومال اللى خلصت دى كانت سنة كام ؟!”
“قصدى 2013 ,, معلش يا ماما لسة اول يوم فى السنة بقى و لسة مخدتش على السنة الجديدة و كدة ”
“طيب,, اغسلى وشك بقى و روحى وضبى المطبخ ”
“حاضر يا ماما”
ادينا اتدبسنا فى المطبخ و الحمد لله 😐 , ليه بقى الناس اللى بتخترع و بيتكلمو دايما عن التقدم العلمى لسة مخترعوش طاقية الاخفا ؟! الناس دى مش شايفة شغلها صح على فكرة !!
*********************
يااااااااه !! ده انا عمرى ما حسيت بأى سنة جديدة , لأ حقيقى انا فجاة كدة باخد بالى ان السنة القديمة خلصت و الجديدة بدأت , يمكن عشان دايما بيبقى عندى امتحانات فى الوقت ده من السنة ,
يا بيبقى عندى امتحان يا اما بذاكر لإمتحان ,, عشان كدة شعورى تجاه شهر يناير ,, هو نفس شعورى تجاه البتنجان .. بالظبط و الله
بس المرة دى بقى معنديش اى امتحان , المرة دى فى الفراغ العملاق اللى انا فيه ده اقدر احس السنة الجديدة ,, هي دى فايدة القعاد فى البيت .. صبرت و نلت والله ..
فتحت موبيلى , لاقيت رسايل كتييير كلها “هابى نيو يير” و على الوول فى الفيس بوك , تاجات بالهبل عشان السنة الجديدة ,,
المصريين دول ما بيصدقو يلاقو مناسبة ,,, ده احنا الشعب الوحيد اللى بيقول “كل سنة وانت طيب” اكتر ما بيقولو “ازيك اخبارك ايه”
لأ و كل “كل سنة و انت طيب” ليها معنى مختلف ,, مثلا:
كل سنة و انت طيب ===> العادية بتاعة التهانى ,
كل سنة و انت طيب بقى ===> يعنى عديها,
ما كل سنة و انت طيب ===> يعنى خلاص بقى انت لسة فاكر ,
و اخيرا كل سنة و انت طيب ===> يعنى فلوس !!

المهم ان الناس كلها بتهنى و بتبارك بحرارة اوى السنة دى ,
يمكن عشان ارتاحو لما 2012 عدت اللى كانوا مطلعين عليها اشاعات و افلام تاكد انها اخر سنة لكوكب الارض ,
و اننا كلنا هالكين لا محالة , و طلعو نظريات و حقائق علمية تؤكد ان 2012 هيا النهاية !! صحيح العلم لا يكيل بالبنتجان (بتنجان تانى :s !!) مش بقولكو الناس دى مش شايفة شغلها اصلا !!
بس حقيقى , 2012 كانت سنة كبيييسة بمعنى الكلمة ,,, على المستوى الشخصى و المستوى المصرى و العالمى كمان دى حتى امريكا نفسها , اعتقد بعد اعصار ساندى و حادثة الاطفال فى المدرسة امريكا هتحط 2012 بعد 2001 على طوول فى السنين السودا اللى عدت عليهم
هما اللى فاولو على نفسهم من الاول محدش قالهم يفتو الفتية الكبيرة بتاعة نهاية العالم دى ,,

بس الناس اللى متخيلة ان 2013 هتبقى احسن ,, احب اقولهم .. 13 ؟! حقيقي ؟!
ايه يا جماعة انتو مش بقروا تاريخ ؟! مش عارفين ايه اللى حصل سنة 1913 ؟!
خدوا عندكو :
نشوب الحرب البلقانية الثانية والتي كان سببها هو رغبة بلغاريا في انتزاع إقليم مقدونيا الشمالية من صربيا وقد انتهت هذه الحرب بعد 42 يوما من اشتعالها بمعاهدة بوخارست في أغسطس 1913.
ادى حرب اااهى ( محدش يسألنى يعنى ايه بلقانية ولا فين بلغارية و لا مين مقدونيا … كلهم خلق ربنا و ناس كويسيين يعنى)
بلاش 1913,,
1813:
عام: 1813 انضمام إنجلترا إلى روسيا والسويد في محاربة فرنسا.
اهوو حرب تانية اهوو , يعنى اساسا 13 ده ساعة الصفر بتاعة الحرب (اشمعنى يعنى انا اللى مش هفتى!! اذا كان العلماء فى امريكا بيفتوا )

احنا لو فكرنا فى التاريخ كويس و دققنا كدة هنلاقى ان بالتالى فى 2013 صربيا و بلغاريا و فرنسا هيتحدوا و يحاربو انجلترا و السويد و روسيا , و اللى هيكسب فيهم هيلاعب مصر على ارضها .. آاا اقصد هيحارب مصر عشان يسيطر على العالم ..
امممممممممم
و الناس يا يعنى غلابة ولا دارينين بحاجة و بيهنوا بحرارة اوى و متفاءلين ب 2013 ..

“خلصتى المطبخ ”
ماما قطعت حبل افكارى
“اه يا ماما خلصت اهوو ”
دايما القرارات المصيرية و الابداع بيجى بس اثناء توضيب المطبخ , الوحى بينزل ساعتها بس 😀
*****************
الناس مفكرة ان السنة هتيجى و معاها حاجات كويسة او حاجات وحشة ,,
و فى الحقيقة السنة بتيجى فاضية تماما زى الاجندة الجديدة و كل واحد فينا يا بيملها تجارب و انجازات يا بيملها شكاوى يا بيسيبها فاضية لحد ما تيجى السنة الجديدة ,
انت لوحدك اللى مسؤل عن السنة اللى جاية , انت لوحدك اللى تقدر تخليها سعيدة , او تعيسة , او كبيسة .

نهاركم سعيد 😀

 

Posted in sarcastic | 2 Comments

Hey there :) !

فى الوقع … آااا احم

 دى مش اول مرة اعمل مدونة ,, و على الرغم ان الموضوع كل مرة بيفشل بس الواحد الحقيقة بيلف يلف و يرجع يحن للتدوين …

و بما ان قاعدة البيت وحشة اوى , و لقب “عاطل” اوحش بمراحل ,,, ولأن مساحة التفكير بقيت كبيرة اوى 🙂 .. لقيت ان حياتنا     فيها تفاصيل تستحق التدوين و البروزة كمان ,, لذلك قررت اقوم بالمهمة دى نيابة عنكم جميعا ,, شوفو هتدفعوا كام بقى 🙂 , وهيا هتبقى مدونة عامة ملهاش نشاط معين و اكيد ملهاش نشاط سياسي , انا بقول من الاول اهوو عشان نبقى واضحين 🙂 و عشان  كدة اتمنى ان اى حد يقرا المدونة دى يحس انها بتعبر عن جزء منه و لو بسيط ,,او انها ترفه عنه او ايا كان يعنى المهم انكو تقروها و خلاص 😀 

ملحوظة : الاشخاص و الاحداث فى اى حاجة هتتقال بعد كدة ممكن تبقى حقيقية و ممكن تبقى محض خيالى (حلوة محض دى ) احم يلا نبتدى بقى 

Posted in sarcastic | Leave a comment